ياحايـل الحاتميّـه بعـد طـول الغيـاب    جيتك وشوقي يسابقني لشوف الهضـاب

قمت أستفزّ القوافـي وأنتخـي بالجزيـل    ناديت ويـن الأمـل والحمـدلله أجـاب

سبعة سنين وثمـان أبعـدت ماهوجفـى    كافحت أنا الوقت وأتحدّى السنين الصعاب

وأيقنت بأن الغياب إن طـال لازم أعـود    وشيّبت ياعايـد لحايـل وتـوّي شبـاب

سـلام يالحاتميّـه قلـت يسعـد مسـاك    يطيب فيك المقام ولك يصـاغ الخطـاب

منزل هلي لابتي والطيـب فيهـا يشـاف    على سفوح الجبال الشامخه لـه كتـاب

أهلاً بكم تدعي الضيفان من كـلّ صـوب    في حايل أقبل هلا حييّت والكيـف طـاب

وطالع لسود الجبال وياضحلـك شمـوخ    للاّبة اللّي مـع الأمجـاد لـه إنتسـاب

أحب حايل وأهلهـا شـي ماهـو جديـد    ياعزوتي يابعـد حيّـي طلبكـم مجـاب

بيتيـن سجلتهـا يومـي لحايـل لفيـت    بعد الغياب الطويل اللّي سعـى للذهـاب

يتعب خفوقٍ ضمى لمشاهـد أمّ الجمـال    يستأصل من الجُمل مالـذّ منهـا وطـاب

يومي كتبت المعاني لجـل حايـل وقلـت    عشقي وحبّي لها جاوز حـدود السحـاب

المجد ياقف لها إجـلال فـي كـلّ يـوم    لأن الصخى عادت الأجواد شيب وشبـاب

ياما تعنّيت له وأمشـي خطـوط ٍ طـوال    واليـوم بأكنافهـا ودّعـت همّـي وذاب

توّي لقيت الوناسه يوم أشـوف الجبـال    ودّعت حزني وهمّي والشقـى والعـذاب

جميع الحقوق محفوظة لــ الموقع الرسمي للشاعر / محمد القـنيـًاوي

http://h-adbih.com/sh/